Կոտայք, Հայաստան- Թեղենիքի միջնակարգ դպրոցի ուսուցչուհի Գոհար Մովսիսյանի կողմից նախաձեռնված և իրականացված «Բնապահպանական տաղավար» նախագիծը հաջող ավարտ է ունեցել:

Նախագծի նպատակն էր ստեղծել տաղավար, որը կնպաստեր բնապահպանությանն առնչվող խնդիրների վերաբերյալ տեղացիների իրազեկմանը: Տեղացի բնակիչները իրականացված դասընթացի ընթացքում սովորեցին՝ ինչպես բնական պաշարները առավել կայուն օգտագործել և նպաստել բնության պահպանությանը: Ավելին, ձևավորված խումբը ծանոթացավ և մասնակիցը դարձավ կոմպոստացման ու վերմիկոմպոստացման գործընթացներին:

Տաղավարի կառուցման աշխատանքները սկսվել են 2016 թվականի ապրիլին: Շինարարական աշխատանքներին կամավոր սկզբունքով մեծ աջակցություն են ցուցաբերել տեղի համայնքի բնակիչները: Հունիս ամսին Թեղենիքի միջնակարգ դպրոցից 12 աշակերտներ և Արզականի միջնակարգ դպրոցից 14 աշակերտներ շրջայց ունեցան տաղավարում: Ծրագրի կազմակերպիչ տիկին Գոհար Մովսիսյանը թափոնների արդյունավետ կառավարման վերաբերյալ դասընթաց անցկացրեց: Սեմինարի ընթացքում օգտագործվեցին GIZ գերմանական համագործակցության և «ԷՅ-ԹԻ-ՓԻ կազմակերպության կողմից մշակված վերապատրաստման մոդուլները:

Ինչպես նշեցին երեխաները, սեմինարի ամենաոգևորիչ փորձը վերմիկոմպոստացումն էր: Տիկին Մովսիսյանը ցանկություն հայտնեց ապագայում համագործակցել տարբեր կազմակերպությունների հետ և ավելի բազմազան աշխատանքներ ներառել տաղավարի գործունեության մեջ:

Ծրագիրը հանդիսանում է «Բնապահպանական կրթության փոքր ծրագրերի մրցույթի» 10 հաղթողներից մեկը: Հաղթող ծրագրերը լավագույնն էին Հայաստանից և Արցախից ստավցած 130 դիմումներից: Մրցույթը կազմակերպվել է ՀԱՀ Յակոբեան բնապահպանական կենտրոնի կողմից: Ընտրություն կատարող հանձնաժողովը, որի կազմում էին Բնապահպանական կրթության ցանցի (ԲԿՑ) անդամները, ընտրել և հաստատել են հաղթող ծրագրերը:

Մրցույթն իրականացվել է Նորվեգիայի դեսպանության փոքր դրամաշնորհային ծրագրի աջակցությամբ և ուղղված է Հայաստանում բնապահպանական կրթության կարողության զարգացմանը, ինչպես նաև Բնապահպանական կրթության ցանցի (ԲԿՑ) հիմնադրմանն ու ամրապնդմանը: ԲԿՑ-ն ուսումնական համագործակցություն է քաղաքացիական հասարակության, կրթական հաստատությունների, կառավարության և միջազգային կազմակերպությունների միջև:

ՀԱՀ Յակոբեան բնապահպանական կենտրոնը (ՀԱՀ ՅԿԲ) Հայաստանի ամերիկյան համալսարանի հետազոտական կենտրոն է: ՀԱՀ ՅԿԲ-ն հետազոտության, կրթության և համայնքի հետ կապերի միջոցով խրախուսում է բնական միջավայրի պահպանությունն ու վերականգնումը: ՀԱՀ ՅԿԲ-ի աշխատանքները ներառում են հետևյալ թեմաները` բնական ռեսուրսների կայուն կառավարում, կենսաբազմազանություն և պահպանում, կանաչ կառուցապատ շրջակա միջավայր, մաքուր էներգիա և էներգաարդյունավետություն, ինչպես նաև տեղեկատվական տեխնոլոգիաներ և շրջակա միջավայր:

13517728_257491591289048_452813914_o13518058_257492441288963_1332556308_o13518063_257492951288912_1858960173_o13524102_257491044622436_1460303573_o13555483_257492104622330_451069025_o13555583_257490701289137_2111146954_o